Sentyabrın 15-də teatr mövsümünün təntənəli açılış mərasimi keçiriləcək. Açılış əsaslı təmir olunan Azərbaycan Dövlət Gənc Tamaşaçılar Teatrının qarşısında olacaq. Həmin gün ölkədə fəaliyyət göstərən 26 teatr yeni mövsümə birgə start verəcək.
Bu bayram şənliyində iştirak edəcək S.Vurğun adına Azərbaycan Dövlət Rus Dram Teatrı yeni mövsümdə tamaşaçıları müxtəlif səhnə əsərləri ilə sevindirəcək.
Teatr builki mövsümünü “Kral Lir” tamaşası ilə açacaq. Məzuniyyətdən qayıdan yaradıcı heyət isə artıq yeni tamaşanın məşqlərinə başlayıb.
Rus Dram Teatrı 89-cu mövsümündə tamaşaçılarına təqdim edəcəyi ilk tamaşa “7 örpəyin rəqsi” adlanır. Tamaşa teatrın aparıcı rejissorlarından olan Boris Lukinski tərəfindən səhnələşdirilir. Bu mövsümdə həmçinin xalq yazıçısı Elçinin “Cəhənnəm kirayəçiləri”, böyük rus yazıçısı Dostoyevskinin “Karamazov qardaşları” və “Rossinin faciəsi” əsərləri də səhnə həyatı yaşayacaq.
Teatr balaca tamaşaçıları da yaddan çıxarmayıb. Mövsümün sonunadək onlara bir-birindən maraqlı yeni səhnə əsərləri, o cümlədən Yeni il və Novruz bayramı münasibətilə hazırlanacaq bədii proqramlar təqdim ediləcək.