Ermənistan Hərbi Hava Qüvvələrinə məxsus vertolyot işğal olunmuş Azərbaycan əraziləri üzərində uçuş keçirdikdən sonra Ağdərə rayonunun 3 nömrəli sovxoz adlanan ərazisində, qoşunların təmas xətti yaxınlığında eniş edib və bir daha qalxa bilməyib.

APA-nın Qarabağ bürosu xəbər verir ki, hərbi vertolyot sentyabrın 5-də günün ikinci yarısında Ağdam istiqamətində uçuş etdikdən sonra Ağdərə-Tərtər istiqamətində hərəkət edib.

Dünən axşam saatlarında keçmiş Ağdərə rayonun Modagez kəndi yaxınlığındakı su anbarının yaxınlığına enən vertolyot naməlum səbəblərdən hələ də oradadır. Qeyd edək ki, vertolyot son günlər həmin istiqamətdə Ermənistan Silahlı Qüvvələri tərəfindən keçirilən hərbi təlimlərlə bağlı əraziyə gəlib.

Ehtimal olunur ki, qondarma Dağlıq Qarabağ Respublikasının “müdafiə naziri” keçirilən hərbi təlimləri müşahidə etmək məqsədilə həmin vertolyotla əraziyə gəlib, amma yaranan texniki nasazlıq səbəbindən vertolyot düşdüyü yerdən qalxa bilmir