Fransa, Böyük Britaniya və İsveçin xarici işlər nazirləri qlobal istiləşmə ilə mübarizə ilə bağlı beynəlxalq strategiyanın təcili surətdə hazırlanmasına və ümumdünya ətraf mühit təşkilatının yaradılmasına çağırıblar. ANS PRESS, “Associated Press” agentliyinə istinadən xəbər verir ki, nazirlər Bernar Kuşner, Devid Miliband i Karl Bild ötən axşam Parisdəki Siyasi Elmlər İnstitutunda əcnəbi tələbələr qarşısında çıxış ediblər.
Fransanın xarici işlər naziri Bernar Kuşner bildirib ki, dünya ölkələri tələsməlidirlər: “Biz fəlakətlə üz-üzəyik. Bu fəlakət qaçılmazdır. Üç aydan sonra Kopenhagendə BMT-nin iqlimlə bağlı konfransı keçiriləcək. Tədbirdə beynəlxalq ictimaiyyət iqlim dəyişiklikləri ilə mübarizə rejimini işləməlidirlər”. Nazirin sözlərinə görə, qlobal istiləhmə ilə təcili mübarizə ideyası bütün dünya insanlarının şüurunda kök salmalıdır.
İsveçin xarici siyasət idarəsinin başçısı Kard Bild isə qlobal istiləşmə ilə əlaqədar siyasi münaqişələr təhlükəsi barədə xəbərdarlıqla çıxış edib: “Əgər iqlim dəyişikliyi davam etsə və Mərkəzi Asiyada çaylar qurumağa başlasa, bu, siyasi münaqişələrə və fəlakətə aparıb çıxaracaq. İqlim dəyişiklikləri təhlükəsizliyimiz və maraqlarımızı təhdid edən hadisələrə səbəb ola bilər”.
Böyük Britaniyanın xarici işlər naziri Devid Miliband bəyan edib ki, qlobal istiləşmə ilə bağlı problemlərin həlli üçün yoxsul ölkələrlə koalisiya yaradılmalıdır: “Avropa Birliyi onlara yardım edə biləcəyi tədbirləri müəyyənləşdirməlidir”. Nazirin fikrincə, Braziliya və Meksika kimi inkişaf etmiş ölkələrlə də ittifaq yaradıla bilər. // ANSPRESS