Məktəb vaxtı yadımdadır, Rus yazıçısı Aleksandr Kuprinin esərlərini keçirdik (rus sektorunda oxuyanlar bilər yəgin). Bu yazıçının şah əsərlərindən biri Qranatovıy Brasletdir. Çox maraqlı hekayəsi var idi. Düzü detalları yadımda deyil, amma hekayə Vera adlı bir xanımın ad günündə bir nəfərin ona məktubla bərabər göndərdiyi bilərzikdən başlayır. Bilərziyin üstü qranat daşı ilə bəzənmişdi. Qranat daşın adıdır və əsl qranatın rəngi qırmızı olur, nar gilələri kimi. Daşın adı elə qranat, yəni nar sözündən gəlir. Qranatoviy Salat adı da məncə elə bu hekayədən gəlir. Düzü burada daş-qaş yerinə yeməli nar dənələri var, bu da ki mənə daş-qaşdan daha maraqlı gəlir:) Olduqca ləzzətli salatdır. Nuş olsun!
Nar Bilərziyi Salatı (Qranatovıy Braslet) Qeyd: Bəzən bu salatın içinə yağda qızardılmış soğan da qatırlar, amma mən salatda artıq yağlı ərzaqlar (mayonez, qoz) olduğundan soğançadan istifadə etmirəm. 3 ədəd yerkökü 3 ədəd kartof 2 ədəd kiçik və ya 1 ədəd iri çuğundur 3 ədəd yumurta 1 stəkan qoz ləpəsi - xırda-xırda doğranmış 2 ədəd sümüksüz, dərisiz toyuğun döş əti mayonez (istəyə görə mayonezi xamayla qarışdırmaq da olar) duz istot nar dənələri (təxminən 1 iri nardan) Yerkökü, kartof, çuğundur (ayrı qazanda) və yumurtanı suda bişirin. Sürtkəcin iri gözündən keçirib ayrı-ayrı qablara yığın. Ayrı qazanda bir az duz salınmış suda toyuq ətini də bişirib, əlinizlə didin. İri yastı qabın ortasına su stəkanı qoyun. Ərzaqları bu stəkanın ətrafında bu ardıcıllıqla yayın: Qeyd: arada layları duzlayın, amma çox deyil, çünki mayonez duzlu olur. 1. kartof 2. mayonez (təxminən 2 x. qaşığı) 3. çuğundurun yarısı 4. mayonez 5. yerkökü 6. mayonez 7. qoz 8. toyuğun yarısı 9. mayonez 10. yumurta 11. mayonez 12. qalan toyuq 13. mayonez 14. qalan çuğundur 15. mayonez Axırda mayonezi salatıın hər tərəfinə çəkin. Üstünə və kənarlarına nar dənələri səpin və əlinizlə yüngülvari basın ki, yapışsınlar. Bir neçə saatlıq soyuducuya qoyun.
|